परंतू या संचारबंदी च्या काळात देशातील जनतेसाठी अहोरात्र झटणारे आपले डॉक्टर्स, नर्स, पोलीस यंत्रणा, कर्मचारी, सफाई कर्मचारी, अग्निशामक दल, आरोग्य विभाग कर्मचारी तसेच बेघरांना उपासमारीने जीवीतहानी होऊ नये म्हणून वसई विरार शहर महानगरपालिकेच्या निर्देशानुसार आपण त्वरीत दोन वेळेच्या जेवणाची व्यवस्था सुरू केली व त्याप्रमाणे वाटप सुध्दा आजपर्यंत करत आहोत. संचारबंदीच्या काळात गोरगरीब, सामान्य माणूस जेवणासाठी घराबाहेर पडू नये. तसेच ज्यांचे मीलमजूरी करून दररोजचे पोटापाण्याचा प्रश्न सुटत होता त्यांच्यापुढे या संचारबंदी काळात एक वेळच्या जेवणाचा प्रश्न सुध्दा गंभीर होत गेला.
“या लॉकडाऊन च्या काळात वसई विरार नालासोपारा परिसरात एक‌ही नागरिक उपाशी राहू देणार नाही” अशी घोषणा बहुजन विकास आघाडीचे अध्यक्ष लोकनेते आमदार श्री. हितेंद्रजी ठाकूर यांनी केली.
याच पार्श्वभूमीवर वसई विरार नालासोपारा शहरातील ट्रस्ट, स्वयंसेवी संस्था, मित्र परिवार आणि इच्छुक दात्यांना संपर्क करून श्री जीवदानी देवी संस्थान, श्री साईधाम मंदिर ट्रस्ट व इतर ट्रस्टच्या विश्वस्तांशी चर्चा करून विभागातील गोरगरीबांना अन्नपुरवठा करण्याची योजना आखली. त्याप्रमाणे जिल्हाधिकाऱ्यांबरोबर झालेल्या चर्चेप्रमाणे बेघरांसाठी सुध्दा दोन वेळच्या जेवणाची सुविधा करण्यात आली आहे. तसेच स्थानिक प्रशासनाद्वारे वसई विरार शहर महानगरपालिका हद्दीत व आजूबाजूच्या ग्रामीण भागात सुध्दा स्थानिक लोकप्रतिनिधींद्वारे गरीब लोकांची माहिती घेऊन त्यांना सुध्दा दररोज दोन वेळच्या जेवणाची सुविधा करण्यात आली आहे.
दररोज ४५०० ते ५००० गरजूचे जेवण हे दिवसभरात श्री जीवदानी देवी संस्थान तर्फे पुरविण्यात येत आहे. त्यासाठी प्रशासनाने दिलेल्या योग्य त्या सूचनांचे पालन सुध्दा करण्यात येत आहे.
